ОХУ-аас ямар зорилгоор шатахуун зээлж байгаа бэ?

2016 оны 02 сарын 04, 11 цаг 57 минут

Засгийн газрын зүгээс ОХУ-аас шатахуун зээлэх асуудлыг энэ оны эхээр хөөцөлдөж эхэлсэн байдаг. Уг асуудал холбогдох газруудад хэлэлцээрийн түвшинд сар орчим үргэлжилснээр манай улс ОХУ-аас шатахуун импортлохдоо төлбөрийг нь хийлгүйгээр авах нөхцөл бүрдсэн талаар ерөнхий сайд намын бүлэг дээрээ мэдээлсэн юм.

Манай улс сүүлийн жилүүдэд шатахууны импортын эх үүсвэрийг нэмэгдүүлэх чиглэлд анхаарч, ОХУ-ын "Роснефть”, БНХАУ-ын "Чайна Ойл” зэрэг компаниудаас дэлхийн зах зээл дээрх түүхий газрын тосны үнэтэй уялдуулсан аргачлалаар тооцсон үнээр шатахуун импортолдог болсон. Түүнчлэн энгийн хэрэглээний шатахууны нөөц 35-50 хоногийн хооронд хэлбэлздэг бөгөөд шатахуун импорлогчид дотоодын томоохон хэмжээний ханган нийлүүлэлтээ ч тогтмол хийсээр ирсэн билээ.

Тэгээд ч шатахууныг компаниуд импортлон оруулж ирдэг байхад Төрийн зүгээс "зээлэх" асуудал сөхсөн нь олны анхаарлыг татсан юм. Өөрөөр хэлбэл, гаднаас зээл, тусламж гуйж бэдэрсэн энэ цаг үед импортын шатахуунаа хүртэл Төрийн оролцоотойгоор зээлэх шаардлага байна уу гэх асуулт гарч ирсэн.

Төр өөрөө шатахууны бизнес эрхлэгч биш учраас энэ үйлдэл иргэдэд илүүц харагдсан нь нууц биш.

АН-ын бүлгээс "Оны эхний улиралд төсвийн төвлөрлөөс үүдэн бэлэн мөнгөөр шатахуун худалдан авахад хүндрэл үүсдэг. Тиймээс засгийн газрын зүгээс худалдан авалтынхаа үнэн дүнг дараа нь төлөх нөхцөлийг бүрдүүлж өгөхөөр ажилласан байгаа. Малчид хавраас өмнө зээл аваад, ноолуураа гарахаар эргүүлэн төлдөгтэй ижил ойлголт" гэх тодруулга өгч байсан.

Харин Уул уурхайн сайд Р.Жигжидийн тайлбарлаж буйгаар бол Төрийн оролцоотойгоор манай шатахуун импортлогчид ОХУ-ын банкнаас бага хүүтэй зээл авч, шатахуунаа оруулж ирэх юм. Оны эхэнд вальютын хомсдол үүсгэхгүйн тулд тэндээс зээл авах санааг засгийн газраас хэрэгжүүлж байгаа аж