АМГ дахин алдаа гаргав уу?

2015 оны 09 сарын 30, 15 цаг 42 минут

Ашигт малтмалын газар тендерийн сонгон шалгаруулалтаа хууль бусаар явуулсан талаар компаниудын төлөөлөл өчигдөр мэдээлэл хийлээ. Ховд аймгийн Алтай сумын Богоч гэх талбайд хайгуулын тусгай зөвшөөрөл олгох сонгон шалгаруулалтыг өнгөрсөн наймдугаар сарын 25-нд нэг сарын хугацаагаар тус газраас зарлажээ.

Тендерийн хугацаа дуусч, 25-нд буюу өнгөрсөн баасан гаригт компаниуд материалаа өгөхөөр очжээ. Гэвч хэдхэн компанийн материалыг аваад бусдыг нь орхигдуулсан, төөрөгдүүлсэн тушаалаар үнэлсэн тухай "Баян газрын хишиг”, "Ундрах өргөө” компанийн хуулийн зөвлөхүүд ярилаа. "Баян газрын хишиг” компанийн хуулийн зөвлөх Б.Сугар "Урилгад тендерийн материалыг 25-ны 17:00 цагт хүртэл хүлээж авна гэсэн байсан. Компаниуд өглөөнөөс хойш дугаарлахад 16:00 цагаас материал авч эхэлсэн. Ингэхдээ эхний хэдхэн компанийн материалыг хүлээж аваад хугацаа нь дуусчихсан. Энэ нь ашиг сонирхлын зөрчилтэй үйлдэл гэж бид үзэж байгаа. Компаниуд шударга өрсөлдөх эрх ашгийг боогдуулсан явдал. Өөрсдийнхөө компаниудад өгөх байсан юм бол нийтэд зарлах шаардлага байхгүй. Бид үргэлжлүүлж тэмцэнэ” гэв. Тэд энэ талаар АТГ, ШӨХТГ, Уул уурхайн яаманд гомдол гаргахаар болжээ.

АМГ-ын талаарх гомдол ингээд дуусахгүй. Хайгуулын тусгай зөвшөөрлийг цахимаар олгох ажиллагаа хэдэнтээ гацаж компаниудад хүндрэл учруулсан талаар бид өмнө нь мэдээлсэн. АМГ-ын ажлын хэсгийнхэн олон удаа хуралдаж шинжилсний эцэст систем өнгөрсөн наймдугаар сард гацсан шалтгааныг ачааллыг тооцоолоогүй байсан, сүүлийнхийг системийн кодод алдаа гарсан гэж дүгнэжээ. Уг нь Монгол Улсын газрын доорх баялгийн мэдээллийн сан хамгийн найдвартай байх ёстой. Ачааллаа даадаггүй, алдаа гардаг системээр үндэсний аюулгүй байдлын хэмжээнд яригдах ажлыг хийсээр байж болох уу?