-Петро Чайна Дачин Тамсаг компанийн үйл ажиллагаатай холбоотой зөрчлүүд өмнө нь  нэлээд илэрсэн. Газар дээр нь ажиллахад бодит нөхцөл, байдал ямар байв?

-Би гурван зүйлийг шалгасан. Нэгдүгээрт, замын асуудал байна. Ерөнхий сайд болон УИХ-ын дарга Петро Чайна компанийн үйл ажиллагаатай танилцахаар очих бүрт нь урдаас нь "Манайх асфальтан зам тавъя” гэдэг. Гэтэл одоо хүртэл тавиагүй байгаа. Энэ зам нь стратегийн маш чухал ач холбогдолтой. Тухайлбал, 26 км яваад Мянганы замтай, 68 км яваад Байгалийн үзэсгэлэнд цогболбор болох Буйр нууртай огтлолцдог. Тиймээс 207 км асфальтан зам, 139 км сайжруулсан зам тавих ёстой. Энэ үүргийг биелүүлэхгүй өнөөдрийг хүрсэн нь эхний асуудал. Хоёрдугаарт,Тэнд ажиллаж буй монгол ажилчдын асуудал байна. Хөдөлмөрийн яамнаас тусгай эрх авсан "Зөв боломж” гэх байгууллагын зуучилсан ажилчдын ахуй орчин, цалин мөнгө, нийгмийн даатгалтай холбоотой янз бүрийн асуудал гарсныг  шалагалаа. Гуравдугаарт, шатахуун зөөвөрлөдөг Петро дайчин компанийн тээврийн хэрэгслүүдтэй холбоотой асуудал байна. Тус компанийн зүгээс шатахууныг тээвэрлээд Хятад руу гаргадаг учраас тус улсын номертой байх ёстой гэсэн тайлбарыг хэлдэг. Ийм шалтгаанаар олон улсын гэрээ хэлцлийг хэрэгжүүлэхгүйгээр хятадын дугаартай машинуудыг явуулдаг. Гэхдээ талбай дээр ажиллах тусгай зориулалтын машинуудыг Монголоос авах ёстой. Тэнд монгол жолооч нарыг ажиллуулах ёстой юм.

-Өнөөдөр яг замын нөхцөл байдал ямар байна вэ?

-Бид 19 болон 21-р талбай руу явж очсон. Бороо орсны дараа явсан болохоор ч тэр үү  хүнд байсан. Зөөлөн хөрстэй газар дээгүүр хүнддаацын машинаар 23 жил талхалхчихаар ямар байх нь ойлгомжтой биз дээ.

-Зам тавихгүй байгаа шалтгаанаа тус компани юу гэж тайлбарласан бэ?

-Гэрээний дагуу бол 2013 оны есдүгээр сард зам тавих ёстой. Хэрвээ замаа тавихгүй бол тээвэрлэлтээ зогсооно гэж гэрээнд заасан байгаа. Асуудлын гол нь замаа тавиагүй мөртлөө тээвэрлэлтээ явуулсаар байгаад байгаа юм. Би "Та хэдийн зав, цаг болохгүй байж магадгүй. Тэгэхээр төрийн байгууллагаас тээвэрлэлтийг нь зогсоохоос өөр аргагүй. Тэр тохиолдолд шатахуун Монгол улсад байж байна. Мэдээж шатахууныг зөөвөрлөх ажиллагаа түр хугацаагаар хойшилно. Харин замаа тавиад дууссаны дараа тээвэрлэлт явагдах ёстой. Ямар шалтгаанаар замаа тавихгүй байгаа юм бэ” гэж асуусан. Харин тус компанийн холбогдох албан тушаалтнууд 2015 оны 10 дугаар сардаа 107 км замыг үлдсэн 100 км замыг 2016 оны 12 сарын 31-ний өдөр гэхэд тавьчихна гэсэн. Тэд нар Буйр нуураас "Петро Чайна” компани хүртэлх 68 км замыг эхлүүлэх сонирхолтой байгаа. Харин уг ажил дээр Зам тээврийн яамнаас маршрут тогтоож өгөхгүй байна гэдэг асуудлыг мөн хэлж байна лээ. Нутгийн иргэд 68 км зам тавигдахыг маш их хүлээж байгаа. Миний зүгээс 14 хоногийн хугацаа өгье. Яриа хэлэлцээрт орох хэрэгтэй. Шинээр гэрээ байгуулах асуудлыг яръя гэсэн. Компанийн тээвэрлэлтийг шууд зогсоох нь бидний зорилго биш.  Гол нь замыг нь тавиулах ёстой.

-Зам тээврийн яамтай хэлэлцээрт орж асуудлыг шийдвэрлэх юм байна. Үр дүн эерэгээр гарахгүй бол яах бол?

-Зам тээврийн яамтай хэлэлцээрт орж гэрээ дахин хийгдэх ёстой. Мөн тус яамнаас маршрут гаргаж өгөх ёстой. Гурван удаа боломж өгсөн. Хэрвээ боломжийг ашиглахгүй гомдохгүй байлгүй.  Ер нь энэ асуудлыг шалгахад дарамт эхнээсээ ирж байна. Цаашдаа нилээн дарамтууд ирэх юм шиг байна. Гэхдээ би үүнээс айхгүй байгаа.