Тавантолгойн хөрөнгө оруулалтын гэрээ удтал маргаан дагуулсны эцэст ажлын хэсгийн дүгнэлт гаргахаар болж,

нэг сар гаруй хугацаа өнгөрч  буй.  Л.Эрдэнэчимэг  гишүүн тэргүүтэй ажлын ажлын хэсгийнхэн уг гэрээг дахин нягталж, 60 хуудас бүхий дүгнэлт бэлтгэн, УИХ-ын З.Энхболдод удахгүй хүргүүлнэ гэсэн утга бүхий мэдээллийг өнгөрсөн долоо хоногт хийсэн.

Гэвч дүгнэлт өнөөг хүртэл УИХ-ын даргад очоогүй байгаа нь хаврын чуулганаар уг гэрээг хэлэлцэж амжихгүй нь гэсэн таамагт хүрээд байгаа юм. Тэгвэл Тавантолгойн хөрөнгө оруулалтын гэрээ, хэлэлцэх товын талаар хэн хэн ямар байр суурьтайг байгааг  хэвлэлүүдэд нийтлэгдсэн ярилцлагуудаас ишлэн хүргэж байна.

Ерөнхий сайд Ч.Сайханбилэг:  Тавантолгойн гэрээ бол надаас ах настай, өнгөрсөн зууны 50-иад оноос эхэлсэн хөгшин сэдэв. Румынуудтай хийх гээд бүтээгүй, Югославуудтай хийх гээд бүтээгүй. Японуудтай яриад болоогүй. Энэ нь бол социализмын үеийн түүх. XXI зуун эхлээд бүхэл бүтэн 15 жил өнгөрлөө. Дахиад л хөдлөөгүй байж  байна. Үгүй, тэгээд тайван хийе гээд цаашаа хэдэн жил хүлээх юм бэ. 

Энэ Засгийн газар бол "MCS”-ийн Засгийн газар. Энэ Засгийн газар бол "Женко”-гийн Засгийн газар. Энэ Засгийн газар бол "МАК”-ийн Засгийн газар байхгүй юу.

УИХ-ын дарга З.Энхболд: Тавантолгойн асуудлыг Засгийн газар бие даан шийдэх ёсгүй. УИХ-д Тавантолгойн асуудлыг оруулж хэлэлцүүлэлгүйгээр сайд дарга нар гарын үсэг зурж болохгүй. Монголд алдагдалдтэй гэрээ хэлэлцээр хийхийг зөвшөөрөхгүй. Иймээс заавал үүнтэй холбоотой асуудлыг УИХ-д танилцуулж, хэлэлцүүлсэний дараа гарын үэсэг зурах эсэхийг шийдэх хэрэгтэй. Хэрэв хэлэлцүүлэлгүйгээр гарын үсэг зурсан сайд дарга нартай УИХ хариуцлага тооцно гэдгийг анхаараарай.

УИХ-ын гишүүн Л.Эрдэнэчимэг: 100 жилийн нөөцтэй ард түмний эзэмшилд байдаг. Үүнийг 60 жилээр эзэмшүүлэх тухай гэрээг 14 хоног шалгаж нягтлаад дүгнэлт гаргана гэдэг нь дэндүү богино хугацаа юм.

Хууль зөрчсөн гэрээг УИХ-аар хэлэлцэх шаардлагагүй. Засгийн газар гэрээгээ буцааж аваад хуулийн заалтууддаа нийцүүлээд дахиад өргөн барих ёстой. Харин энэ хувилбараар нь хэлэлцэх шаардлагагүй, яагаад гэвэл хууль зөрчсөн.

Ажлын хэсэг дүгнэлтээ гаргаад л УИХ-ын даргад өгнө. УИХ-аар хэлэлцэх эсэхийг УИХ-ын дарга зөвлөл дээрээ шийднэ байх.

ЗГХЭГ-ын  дарга С.Баярцогт:  Бид ажлын хэсгийн шаардсан материал, мэдээллийг бэлдэж өгч байгаа. Тавантолгойн тогтоолын төслийг Тавантолгойн Ажлын хэсэг УИХ-д өргөн барьснаас хойш тав дахь долоо хоног үргэлжилж байна. Үндсэндээ сар гаруй  хугацаанд ажиллаж байна. Энэ бол дүгнэлт гарахад хангалттай хугацаа гэж харж байна. Зөвхөн ажлын хэсэг биш Монгол Улсын иргэн болгон Тавантолгойн талаар мэдлэгтэй болох хугацааг өнгөрлөө гэж ойлгож байгаа.

УИХ-ын гишүүн Д.Хаянхярваа: МАН-ын бүлэг Тавантолгойгоо УИХ-аар хурдан оруулж ирээд хэлэлцээч л гэж байгаа. Цаг алдалгүй нэг талд нь багтаая л гэсэн саналтай байна. Бүлэг дээр Тавантолгойн доторх асуудлыг ухаж төнхөж ярилцаагүй. Ямар ч байсан оруулж ирж хэлэлцүүлээд цаг алдалгүй эдийн засгийн эргэлтэд оруулах л хэрэгтэй.

Үнэндээ энэ томоохон төслүүдээ явуулахаас өөр зөв сонголт ойрын ирээдүйд бидэнд харагдахгүй байгаа. Тиймээс гэрээ хэлцлүүдээ цаг алдалгүй, бас хуулийн хүрээнд шийдээд явах хэрэгтэй. Ерөнхий сайд, УИХ-ы даргын зүгээс ойлголцолд хүрч, Тавантолгойн асуудлыг шийдээд явахыг л хүсч байгаа болов уу гэж бодож байгаа. Харин асуудлыг удаагаад байгаа нь МАН биш л дээ.

Ж.Мядагбадам