Юмыг хамгийн сайн сурах арга бол
Юм хийх арга. Юм хийхгүй бол
Юу ч сурахгүй.
Зарим хүмүүс мөнгөнд дургүй гэдэг, Мөнгө муухай гэдэг. Мөнгөтэй бол муу хүн гэцгээдэг. Шуналтай энэ тэр гэдэг. Үнэндээ бол тэд мөнгөнд дургүй биш. Мөнгө тэдэнд дургүй байдаг юм. Мөнгө тун их ухаантай. Мөнгөнд чи итгэ. Тэгвэл мөнгө чамд итгэнэ. Даруу бай. Хөдөлмөрч бай. Зорьсон зорилготой бол. Бас шийдэмгий зоригтой бай. Үнэ цэнэ, бүтээлч зан чанараа мөнгөнд таниул. Тэгвэл мөнгө чамд итгэнэ. Мөнгө чамтай нөхөрлөнө. Тийм хүн мөнгөтэй байдаг юм.
Чи юу гэж бодож байна?
Тэгэхээр аав нь чамд "Алтны уурхайн үлгэр" хэлж өгье.
Эрт урьдын цагт, 1990-ээд оны эхээр эхнэр, нөхөр хоёр аж төрөн амьдарч байлаа. Тэр хоёр хүнээс юм гуйхгүй, под хийсэн амьдралтай байсан аж. Түм бужигнаж, төр ядарсан тэр он жилүүдэд манай хоёр бусдын жишгийг дагаж, үүргэвчийн наймаа энэ тэрийг хийжээ. Шатахдаа шатаж, олохдоо олсоор овоо хэдэн төгрөгтэй болоод авлаа. Нөхөр нь Сэлэнгийнх аж. Тэр хоёр нутаг орноо бараадаж, ногоо тарьжээ. Хөл дээрээ босож чадсан гэдэг. Цаашлаад үр тарианы газар авлаа. Төдий удалгүй арвин их ургац хураажээ. Сүрхий их хөлжсөн гэдэг.
Хүү нэг өдөр мэргэн хүнтэй уулзжээ.
Мэргэн хүн хүүд:
-Очир эрдэнэ гэж юу байдгийг чи мэдэх үү? Хаан эзнээс хүчтэй. Бүхнээс үнэтэй тийм эрдэнэ байдаг юм. Түунийг чи олж авах хэрэгтэй. гэлээ.
Хүү:
-Хаанаас би түүнийг олох билээ?
Мэргэн хүн:
-Хичээвэл чи олж чадна аа. Олж чадвал чи алтан титэм өмсөнө. Очир таяг барих болно гэлээ.
Хүү:
-Яаж би түүнийг эзэмдэх вэ? Арга ухааныг нь та хэлж зааж өгөөч? хэмээн гуйжээ.
Мэргэн хүн хүүд:
-Чиний бизнес яах вэ... сайн. Гэхдээ Очир эрдэнэ? Уул уурхайн бизнес гэсэн үг. Эхлээд чи алтны уурхайтай бол. Тэгээд цаашаа... Урагшаа... Үтэр түргэн баяжих тухай үлгэр хүүд ярьж өгчээ.
Хүү эцэг эхээс өвлөж авсан эдлэн газар, орон гэр байгаа бүхнээ худалджээ. Тэгээд тэр хүү очир эрдэнэ, алтны уурхайн эрэлд гарсан гэдэг. Хүү юу ч олсонгүй. Сохор зоосгүй болж хоосорсон гэдэг юм.
Эцэс сүүлд нь хүү усанд хөвөх сарны туяаг "Очир эрдэнэ" гэж андуурч самардаад. Усанд үйж үхсэн гэдэг юм. Гунигтай. Гэхдээ үнэн түүх.
Хүү юу ч олоогүй. Түүнд юу ч олдохгүй. Би ингэж бодож байна.
Хүү бүхнийг мартсан. Эцэг эх, энэрч хайрлах хүн сэтгэлээ тэр гээсэн.
Хүү бүгдийг хаясан. Нутаг ус, орон гэр, өөрт байгаа бүхнээ тэр хаясан. Түүнийгээ худалдсан. Бүтэшгүй хоосон мөрөөдлөөр сольсон. Тийм юм байдаггүй юм.
Тийм учраас хүүд юу ч олдоогүй юм. Би ингэж бодож байна.
Тийм ээ: Юмтай болох хамгийн сайн арга бол Юм хийх арга. Юу ч хийхгүй бол Юу ч бий болохгүй. Залуу хүүгийн худалдсан газраас алт олсон. Залуу сурч, хөдөлмөрлөж тэмцсээр алтан талстыг алтны уурхай болгосон. Өөрөөр хэлбэл очир эрдэнэ болгож чадсан гэсэн үг. Хүү чадаагүй. Залуу чадсан. Бурхан түүнийг ивээсэн. Энэ үнэн.
Аав нь ингэж бодож байна.
Чи юу гэж бодож байна?
Буруугаа эргэж хар.
Эмзэглэж байна уу?
Энэ бурхан чанар
Тэгэхээр миний хүү чи сонс.
Хий хоосон цэцэрхлээс хол бай. Бүтэшгүй мөрөөдөлд хэт битгий авт. Байхгүй юманд битгий ач холбогдол өг. Байхгүй гэж бүү гунихар. Битгий харуус. Байхгүй гэж хичнээн их харуусавч чи юу ч олохгүй. Зөвхөн бодит байдалд тул. Түүнд ойртохыг хичээ. Билэг ухаанаа хөгжүүлж зөв ухаар. Зөв ойлгохыг хичээ. Ингэж үнэн байдлыг ойлго. Тийм байж чадсан хүн. Илүү их сайн сайхныг бүтээдэг юм. Аав нь ингэж бодож байна.
Амьдрал чиний хүссэнээр байхгүй. Амьдрал өөрийнхөө замаар явдаг. Чи түүнийг удирдаж чадахгүй. Тэр өөрийгөө өөрөө удирдана. Юу гэсэн үг вэ? гэвэл Амьдралыг чи зохицуулж чадахгүй. Түүнтэй чи зохицож амьдрах ёстой гэсэн үг.
Тийм байж хүмүүс чамд итгэнэ. Итгэл бол хүч чадал. Хэмжээ үгүй их хүч чадал мөн. Би ингэж бодож байгаа.
Гайхамшигт хүмүүс. Тэд яагаад гайхамшигтай вэ?
Тэд горьдлого найдлага тээдэггүй. Тэд яг одоогоороо байдаг. Тэд юу хийхээ мэддэг. Тийм учраас тэд агуу байдаг юм. Яг одоо чамд юу илүү үнэтэй вэ гэдгээ мэдэрч бай. Зөв олж хар. Дотоод сэтгэлээ сонс. Мэдэр. Тэгэж чадвал чи илүү их ухаалаг амьдарч чадна. Би ингэж бодож байна.
Том жижгийг орхи. Их багыг хая.
Юмыг их гэж бүү шуна. Бага гэж битгий гол. Юу том? Юу жижиг гэж? Олон жижиг зүйлээс том юм оршдог юм. Олон жижиг үйлдлээс их зорилго бүтдэг юм. Тийм учраас бүтээж чадаагүй юманд битгий харамс. Бүтээгүй хүсэлд бүү шат. Юмыг өөртөө тохируул. Би ингэж бодож байна.
Өөрөө өөрийнхөөрөө бай.
Бусдыг бүү дуурай. Бусадтай ижил болох тусам чи үгүй болдог юм. Бусдаас ялгарах ёстой. Энэ бол чиний давуу тал. Давуу тал гэдэг бол давтагдашгүй гайхамшигт чанар. Тийм учраас: Бусдыг битгий дуурай. Бусдаас давуу талаа хадгал. Хөгжүүл. Энэ чиний түлхүүр. Амьдралд хөтлөх түлхүүр. Би ингэж бодож байна.
Миний хүү чи хэн нэгнээс том байх хэрэггүй. Бас дутуу байх ёсгүй.
Тийм учраас миний хүү: Чи хэнд ч дээрээсээ битгий харуул. Хэнийг ч дээрээс нь бүү хар. Хүнийг өөртэйгээ эн тэнцүү хар. Хэн ч том байх ёсгүй. Бас бага байх учиргүй.
Аав нь ингэж бодож байна.
Чи юу гэж бодож байна?