Усны нөөцийг хуваарилах нь хялбар бус ажил гэдгийг Хойд Африк дахь нөхцөл байдал илхэн харуулж байна. Тус бүс нутгийн усны гол судас нь Нил мөрөн. 2011 онд Этиопын эрх баригчид тус мөрний хамгийн том цутгалан болох Хөх Нил дээр Этиопын их сэргэлтийн далангийн барилгын ажлыг эхлүүлсэн. Далангийн зориулалт нь усан цахилгаан станцын усан хангамжийг шийдэж, улмаар Этиопын цахилгаан эрчим хүчний үйлдвэрлэлийг хоёр дахин нэмэгдүүлэх явдал юм. 2020 онд усан санг дүүргэх ажил эхэлж, 2022 онд эхний генераторыг ашиглалтад оруулжээ. Эл мега төслийг хэрэгжүүлэх жинтэй шалтгаан байсан. Этиопын хүн амын дөнгөж 45 хувь нь цахилгаан эрчим хүчээр хангагджээ. Энэ нь Африкийн орнууд дундаа хамгийн доогуур үзүүлэлтүүдийн нэг юм.

Гэвч 74 тэрбум куб метр эзлэхүүн бүхий усан сангийн барилга Египет болон Суданы сэтгэлийг түгшээхгүй байхын асуудал байв. Урсгал дагуу байрладаг эдгээр орны хувьд Нил мөрөн бол цэнгэг усны гол эх үүсвэр. Ингэхдээ Египет улсад Африк тивдээ хамгийн томд тооцогддог 163 тэрбум куб метр багтаамжтай Асуаны усан цахилгаан станц ажилладаг. Эл хоёр аварга том усан сангийн ажиллагааны горим Нил мөрний усны урсцыг тодорхойлдог. Зөвхөн харилцан зохицуулалт хийснээр ухаалгаар ашиглах боломжтой.

Улмаар талууд их болон дунд хэмжээний хур тунадастай жилүүдэд усан санг хэрхэн удирдах талаар тохиролцоонд хүрч байжээ. Харин маргаан дэгдээсэн асуудал нь удаан үргэлжилсэн ган гачигтай жилүүдэд хэрхэх асуудал байв. Египет, Этиоп хоёр одоогоор урт хугацаанд үргэлжлэх ган гачиг гэдгийг хэрхэн тодорхойлох тал дээр ч тохиролцож чадаагүй л байна. 2020 онд АНУ болон Дэлхийн банкны зуучлалаар явуулсан хэлэлцээ юунд ч хүрээгүй.

Дэлхийн дулаарал түгшүүрийн бас нэг шалтаг болоод байна. Уур амьсгал судлаачид дэлхийн дулаарал манай гараг, тэр дундаа Хойд Африкийн хур тунадасны хэмжээнд хэрхэн нөлөөлөх тал дээр санал зөрөлдсөн хэвээр. Зарим судлаачид ган гачиг, үер зэрэг гамшигт үзэгдлүүд нэмэгдэнэ гэж таамаглаж байгаа.

Нил мөрнийг тойрсон ашиг сонирхлыг зөрчлийг шийдэх ухаалаг гарц бий гэж эрдэмтэд үзэж байна. "Communications Earth & Environment” сэтгүүлд нийтлэгдсэн судалгааны ажилд АНУ, Египет, Бельгийн шинжээчид гидрологийн үүднээс асуудалд ханджээ. 1900-2002 оны хооронд авсан Нил мөрний урсцын талаарх мэдээлэл дээр үндэслэн эрдэмтэд янз бүрийн хэмжээний хур тунадастай үеийн нөхцөл байдал, тэр дундаа усан сангуудын ажиллагааны горимын загварчлалыг боловсруулан гаргасан байна. Үүний дүнд эрдэмтэд урт хугацааны ган гачгийг тодорхойлох шинэ хэмжүүрийг боловсруулжээ. Улмаар Асуаны усан сангийн усны хэмжээ 78 тэрбум куб метрээс доош орохыг урт хугацааны ган гачиг хэмээн үзэхээр тогтсон байна. ҮҮнтэй зэрэгцэн эрдэмтэд мөн гамшгийн үр дагаврыг бууруулах долоон аргыг боловсруулжээ. Эрдэмтдийн тооцоолсноор, цогц арга хэмжээ авснаар урт хугацааны ган гачгийн үед ч гэсэн Этиопын усан цахилгаан станцыг 87 хувийн ажиллагааг хангах боломжтой бөгөөд ингэхдээ Нил мөрний доод хэсэгт усны хомтсол үүсгэхээс зайлсхийх боломжтой гэнэ. Харин эдгээр улсын засгийн газар эрдэмтдийн үгийг сонсох эсэхийг цаг хугацаа харуулна.

Газрын давс