- УИХ-ын гишүүн Ё.Отгонбаярын хэрэгт сэжигтнээр нэмж хоёр хүнийг татжээ -

Авилгатай тэмцэх газраас шалгагдаж байгаа хэргүүдийн талаар мэдээлэл хийлээ. Тус газрын мөрдөн шалгах хэлтэст албан тушаал урвуулан ашигласан, их хэмжээний мөнгө шамшигдуулсан гэх УИХ-ын гишүүн Ё.Отгонбаярын хэрэгт хоёр хүнийг нэмж сэжигтнээр татсан бол "Гудамж” төслийн хөрөнгөөс зориулалтын бусаар ашиглаж байсан зэрэг олны анхаарал татсан томоохон санхүүгийн гэмт хэргүүд шалгагдаж байна.

Тодруулбал:
1. БСШУ-ны сайд асан, одоогийн УИХ-ын гишүүн Ё.Отгонбаярыг Багшийн хөгжлийн ордны барилгын асуудал, БСШУЯ-ны барилга захиалагчийн албанаас явуулсан үйл ажиллагаатай холбоотойгоор эрүүгийн хэрэг үүсгэн шалгаж байгаа юм байна. Энэ хэргийн мөрдөн байцаалтын ажиллагаа дуусаагүй байгаа бөгөөд сэжигтэн татах үндэслэл байсан учраас ийнхүү хоёр сэжигтнийг хэрэгт татаж нэмэлт мөрдөн байцаалт явуулж байгаа аж.

2. АТГ-ын мөрдөн шалгалтын явцад Төрийн өмчийн хорооны дарга асан, Үндсэн хуулийн Цэцийн гишүүн Д.Сугар гадаадад байгаа үл хөдлөх хөрөнгө, офшор данс, ихээхэн хэмжээний зээл, хөрөнгө зэргээ мэдүүлээгүй нь тогтоогдсон. Иймээс Д.Сугарт хариуцлага тооцуулах хүсэлтийг Авлигатай тэмцэх газраас Засгийн газрын Хэрэг эрхлэх газарт хүргүүлсэн байдаг. Хүсэлтийг хэлэлцээд Д.Сугарт цалингийн хувиар торгох шийтгэл оногдуулсан.

3. АТГ-аас Ерөнхий сайдын ахлах зөвлөх, Байгаль орчны сайд асан Ч.Гансүх нарыг 3,6 тэрбум төгрөг шамшигдуулсан байж болзошгүй хэргээр шалгаж байна.

4. "Тавантолгой” компанийн захирал асан Х.Түмэнбаярт холбогдох хэргийн мөрдөн байцаалтын ажиллагаа үргэлжилж байна. Тэрбээр "Тавантолгой” компанийн захирлаар ажиллаж байхдаа уг компанийн хөрс хуулалтын ажлыг хийж байсан бусад аж ахуйн нэгжийн тээврийн хэрэгслүүдэд компанийнхаа талбай дээр суурилуулсан хувийн шатахуун түгээх станцаараа дамжуулж шатахуун өгч байсан байна. Энэ үйлдлээрээ тодорхой байгууллага, аж ахуйн нэгжүүдэд их хэмжээний хохирол учруулсан байж болзошгүй гэсэн үндэслэлээр шалгаж байгаа гэнэ.

5. Иргэний нисэхийн ерөнхий газрын дарга асан Х.Батмөнх тэргүүтэй хэд хэдэн хүнийг албан тушаал, эрх мэдлээ урвуулсан хэрэгт холбогдуулан АТГ-т шалгаж эхлээд багагүй хугацаа өнгөрсөн. Энэ хэргийг яллах дүгнэлт үйлдүүлэхээр прокурорт шилжүүлжээ.

6. АТГ-аас хийсэн шалгалтаар аймаг, сум, багийн Засаг дарга нар хандив авах асуудал нэлээд гардаг нь илэрчээ. Тухайлбал, Увс аймгийн Бөхмөрөн сумын Засаг дарга, ИТХ-ын дарга нар аж ахуйн нэгжүүдээс хандив авсан байжээ. Мөн Өвөрхангай аймгийн Засаг дарга ашигт малтмалын үйл ажиллагаа эрхэлдэг аж ахуйн нэгжээс хууль зөрчин хандив авсан асуудал илэрсэн байна. Иймээс хууль зөрчсөн дарга нарт албан тушаал бууруулах хариуцлага тооцохоор албан бичиг хүргүүлээд байгаа гэнэ.

Мөн АТГ-аас нийтийн албанд томилогдож буй хүмүүсийн хувийн ашиг сонирхлын урьдчилсан мэдүүлэг, хууль тогтоомжийн хэрэгжүүлэлтийг байгууллага тус бүр хэрэгжүүлж байгаа эсэхэд шалгалт хийжээ. Энэ шалгалтын хүрээнд дунд шатны нийтийн албан тушаалд томилогдож байгаа хүмүүсийн хууль зөрчсөн асуудлуудыг илрүүлжээ. Мөн өндөр албан тушаал болон агентлагуудын дарга томилох асуудал дээр ашиг сонирхлын зөрчил илэрчээ. Тодруулж хэлбэл, Татварын ерөнхий газрын дарга Т.Батмагнай нь шаардлага, шалгуур үзүүлэлтийг хангаагүй томилогдсон гэлээ. Түүнчлэн Тагнуулын ерөнхий газрын дарга Б.Ариунсан томилогдохдоо мөн л тагнуулын байгууллагын тухай хуулийг зөрчиж, мэдүүлгээ буруу мэдүүлсэн нь шалгалтаар илэрсэн байна. Тиймээс Т.Батмагнай, Б.Ариунсан нарын албан тушаалыг бууруулж, хариуцлага тооцуулахаар Засгийн газрын хэрэг хэрэглэх газарт тус тус танилцуулга хүргүүлсэн байна.

Эх сурвалж www.wikimon.mn