• Харилцан ойлголцлын санамж бичиг нь бизнесийг хамтран явуулах зорилгоор хийдэг, заавал дагаж мөрдөх шинж агуулдаггүй баримт бичиг юм
• Иймд "Ус үзээгүй байж хормой шууж" эцсийн шийдвэр гаргаагүй байхад хоёр хөршийн өмнөөс дур мэдэн ярихгүй байхыг зөвлөдөг гэдэгт найдаж байна
  

Монгол Улсын Ерөнхий сайд ОХУ-д хийсэн айлчлалын үүцээ задлаад байна. Айчлалтай холбоотой мэдээллийн гол цөм нь ОХУ-аас БНХАУ руу дамжуулах байгалийн хийн хоолойг Монголын нутаг дэвсгэрээр дайруулах болсон тухай өрнөлөө. Гэхдээ зөвхөн манай зүгээс Сангийн сайд болон Засгийн газрынхан хийн хоолойг Монголоор дамжуулах талаар харилцан ойлголцлын санамж бичигт гарын үсэг зуруулж, "За” гэж хэлүүлсэн гэж байгаа ч ОХУ-ын "РИА Новости” агентлаг болон "Газпром” компанийн мэдээллээр уг асуудлыг судлаад, зургаан сарын дотор улс орнуудын удирдлагад хариу өгөх тухай дурдсан байв. Харилцан ойлголцлын санамж бичиг нь бизнесийг хамтран явуулах зорилгоор хийдэг, заавал дагаж мөрдөх шинж агуулдаггүй баримт бичиг юм. Мөн ихэнх тохиолдолд санамж бичигт дурдсан асуудлыг гуравдагч этгээдэд задруулахгүй нууцын зэрэглэлд оруулах тохиолдол бий. Иймд "ус үзээгүй байж хормой шууж”, эцсийн шийдвэр гаргаагүй байхад хоёр хөршийн өмнөөс дур мэдэн ярьж, олон улсын дипломат харилцаа, гэрээ хэлцлийн энгийн дүрэм, журмыг зөрчихгүй байхыг холбогдох албаныхан зөвлөж байгаа гэж найдна. Учир мэдэх хүмүүсийн хэлдгээр "Дипломат ёсонд "судалъя” гэдэг бол "дуугүй цаашаа байж бай” гэсэн утгыг илэрхийлдэг” гэх ёгтлолыг санууштай.

"Газпром" компани монголоор дамжуулах хийн хоолойн асуудлыг судлах болно

Алексей Гордеев /ОХУ-ын Шадар сайдын орлогч/

Зургаан сарын дотор Газпром нь Монголоор дайруулах Хятад руу байгалийн хий дамжуулах хоолой барих нь хэр ашигтай болохыг тооцоолох ёстой гэж Оросын Шадар сайдын орлогч Алексей Гордеев пүрэв гарагт мэдэгдэв.

-”Одоо энэ ажлыг "Газпром"-д өгсөн. Эрчим хүчний яам мөн оролцож, эдийн засгийн үндэслэлийг тооцоолж байна. Бид эдийн засгийн хувьд хэр ашигтай вэ гэдгийг ойлгох хэрэгтэй. Энэ зөвхөн БНХАУ- ыг хангах хийн хоолой учраас Хятадын тал ажлын хэсэгт хамрагдана. Зургаан сарын дотор бүгдийг тооцоолж, улс орны удирдагчдад саналаа өгөөрэй" гэж А.Гордеев хэлэв.

Хийн хоолой монголоор дайруулах нь стратегийн зорилт биш

Б.Дэлгэрмаа /ОХУ-д суух Элчин сайд асан/

ОХУ-тай хийн хоолойноос илүүтэй татвар, эрчим хүчний асуудлыг хэлэлцэх хэрэгтэй

-Монгол Улс ОХУ-тай харилцахдаа хийн хоолойноос илүү татвар, эрчим хүчний асуудалд голлон анхаарах ёстой. Бид экспорт, импортын бүтээгдэхүү ний тухай ярихад Евро Азийн бүсээс тогтоосон өндөр тарифтай тулгардаг. Нөгөөтэйгүүр Монгол Улс эрчим хүчний эх үүсвэр хангалттай ч ОХУ-аас хараат хэвээр байна. Эрчим хүчний асуудалд түншлэлийн харилцаатай байх ёстой болохоос хараат байх ёсгүй. Хийн хоолойг Монголоор дайруулах нь зүгээр газар нутгаа ашиглуулах асуудал болохоос стратегийн зорилт биш.

Монголын нутагт 1060 км хийн хоолой барина

Монголын нутгаар хийн хоолой дамжуулах нь зөвхөн манай талын л хүсэл байсан шүү дээ. Анх удаа ОХУ "за” гэж хэллээ.

-Албан ёсны хэлэлцээгээр яригдсан зүйлүүдийг хэлье. ОХУ байгалийн хийгээ БНХАУ-д борлуулах учир гурван талыг хамарсан хэлцлүүд хийнэ. Иймд хууль эрх зүйн орчныг бүрдүүлэх хэрэгтэй. Айлчлалын дүнгээ Засгийн газрын хуралдаанд хэлэлцүүлж, ажлын хэсэг байгуулна. Монголын нутгаар хийн хоолой дайруулах нь зөвхөн манай талын л хүсэл байсан. Үүнийг цаасан дээр буулгаж, харилцан ойлголцолын санамж бичигт гарын үсэг зурлаа. В.Путин БНХАУ руу татах байгалийн хийг Монголын нутгаар дамжуулна гэсэн улс төрийн шийдвэр гаргачихлаа. 

"Газпром" Монголын талтай харилцан ойлголцлын санамж бичигт гарын үсэг зурлаа

Өнөөдөр Сочид "Газпром" -ын гүйцэтгэх захирал Алексей Миллер, Монгол Улсын Шадар сайд Ө.Энхтүвшин нар харилцан ойлголцлын санамж бичигт гарын үсэг зурлаа.

-Уг баримт бичигт ОХУ-аас Хятадад Монгол Улсын нутаг дэвсгэрээр дамжуулах хийн хоолойн хангамжийн төслийн техник эдийн засгийн үндэслэлийн хамтарсан үнэлгээ хийхээр тусгасан болно. 

Хий дамжуулах хоолойг Монгол Улсын нутаг дэвсгэрээр дайруулахаар тохиролцов.

Засгийн газар, ХМОНХХ 

Монгол Улсын Ерөнхий сайд У.Хүрэлсүх В.Путинд бараалхлаа. Уулзалтын үеэр хий дамжуулах хоолойг Монгол Улсын нутаг дэвсгэрээр дайруулах төслийг эхлүүлэхээр тохиролцов. 

-ОХУ-ын Ерөнхийлөгч В.Путин "Төслийг хэрэгжүүлэхэд улс төрийн зүгээс ямар ч саад байхгүй” гэлээ. Хий дамжуулах хоолойг Монгол Улсын нутаг дэвсгэрээр дайруулах талаар олон жил яригдсан ч ажил хэрэг болоогүй байсныг ийнхүү эцэслэж хоёр тал Санамж бичиг байгууллаа. Хоёр улсын судалгааны ажлын хэсгүүд одооноос эдийн засгийн үр өгөөжийг тогтоох, техник, эдийн засгийн үндэслэл боловсруулах зэрэг ажлаа эхлэх юм. Энэ төсөл хэрэгжсэнээр Монгол Улс бүс нутгийн эрчим хүчний интеграцид бодитой оролцох боломж бүрдэнэ.