Үнэ өссөнтэй уялдан Виктория мужийн алтны ордуудын ажиллагаа сэргэж компаниуд шинэ технологиор илүү гүн ухах хэрээр олборлолт 1914 оноос хойш тохиолдоогүйгээр өслөө. Нуугдмал баялаг орд шинээр илрэх тусам Калифорнийн "алтны халуурал”-тай өрсөлдөж байсан 100-аад жилийн тэртээх дуулиант үе эргэн ирсэн мэт санагдана.

"Амьдралдаа ийм юм үзсэнгүй. Газар доороос сэйф гаргаж ирээд байна уу даа гэмээр” хэмээн Baker Steel Capital Managers LLP-гийн захирал, алтны уурхайнуудаар сүүлийн 30 гаруй жил аялж буй Дэвид Бэйкер өнгөрсөн сард Kirkland Lake Gold Ltd-гийн Фостервиллийн уурхайтай танилцсаныхаа дараа ярьсан юм. "Форт Ноксыг ухдаггүй л юм бол ийм их баялаг гарч ирэхгүй” хэмээн захирал өгүүлэв. (Форт Нокс – АНУ-ын алтны нөөцийн сан байрладаг газар).

Тус бүс нутагт дахиад 80 сая унц алтны нөөц байж болзошгүй гэсэн тооцоог Виктория мужийн Засгийн газар гаргасан нь 1851 оноос эхэлсэн алтны чичрэгийн үед олборлосонтой бараг дүйцэж байгаа юм. Шинэ тооцоо Newmont Goldcorp, тэрбумтан Жина Райнхарт зэрэг Австралийн тэргүүлэх олборлогчдын анхаарлыг татлаа.

Бүс нутагт алт олборлолт сэргэсэн нь дэлхийн бусад томоохон хаягдмал хуучин уурхайнуудад ч асар их далд нөөц байгаа юм биш биз гэсэн горьдлогыг компаниудад төрүүлэв.

Бүр анхны "алтны чичрэг”-ийн үед баригдсан Викториан дэгжин барилга бүхий Бендиго хотоос дорно зүгт машинаар 30 минут давхиад хүрэх газарт орших газар доорх хуучин уурхайг Kirkland компани дэлхийн алт олборлолтын хамгийн олз омогтой газар болгосон байна.

Газрын гадаргаас доош 1.2 километрийн гүн дэх хар бараан асга чулуунуудад алтны агуулгатай кварцын цагаан өнгөт бүдүүн судал хөндлөн зурайж харагдана. Алтны хүдрийн хэлтэрхий уурхайн шалаар ч цагаан өнгөөр туяаран гялбах ажээ.

Илүү гүнд нуугдаатай, агуулга-концентрацтай илүү их баялгаас хутгах болсноор Фостервиллийн хувь заяа эрс хувирчээ. Анх 1894 онд нээгдэж арав орчим жил ажиллаад зогссон ил уурхайгаас хожим бүтэн зууны турш хааяахан олборлодог байжээ. Газар доорх гүний уурхай бүр 2006 онд нээгдсэн юм.

"Алтны аль уурхай нөөц сайтай нь хугацаа өнгөрөх хэрээр тодорч байгаа”-г Сиднейд төвтэй BakerSteel Precious Metal Fund-ын захирлын албыг давхар хашдаг Бэйкер тайлбарлав. BakerSteel Precious Metal Fund нь Kirklandын хувьцааг оролцуулаад нийт 450 сая ам.долларын актив хариуцдаг. Фостервиллийн орд бол "доторх нь ихэссээр байгаа эрдэнэсийн хайрцаг” хэмээн захирал тодорхойлж байна.

Анх нэг тонн хүдэрт тав орчим грамм байсан Фостервиллийн уурхайн алтны агуулга 2014, 2015 оны турш аажим өссөөр 2016 оны эцэс гэхэд эрс ихэссэн тул Kirkland уг ордыг хуучин эзэмшигчээс нь 756 сая ам.доллараар худалдаж авчээ. Өнгөрсөн оны эцсийн байдлаар алтны агуулга тонн тутамд 31 граммаар хэмжигдэж байсан нь дэлхийд тэргүүлэх үзүүлэлтийн нэг юм. Sumitomo Metal Mining Co олборлолт явуулдаг Японы Хишикари уурхай л алтны агуулгаар Фостервиллийн урд ордог.

Олборлолт өссөнтэй зэрэгцэн хүдэр дэх алтны агуулга ихэссэн нь дэлхийн зах зээлд алтны үнэ өссөн үетэй давхцаж ашиг орлогыг эрс сайжруулав. Kirkland-ын үйл ажиллагааны ашиг 2019 оны нэгдүгээр хагаст хоёр гаруй дахин сайжирсныг долдугаар сард гаргасан тайланд дурджээ.

Канадад мөн уурхай ажиллуулдаг Торонтод төвтэй Kirkland нь Фостервиллийн гүнээс алтны баялаг агуулгатай өөр бусад бүсийг илрүүлэх итгэл төгс байна. Орчин үеийн агаарын цахилгаан соронзон болон геохимийн хайгуулын технологи нь уурхайчдад газрын гүн дэх өөр бусад хад чулуулаг дор нуугдаатай алтны нөөцийг илрүүлэх боломж олгодог.