УИХ-ын үйл ажиллагаа, батлан гаргасан хууль тогтоомжийн талаар танилцуулж, хуулийн хэрэгжилтийн талаар иргэдийн санал бодлыг сонсохоор УИХ-ын дарга М.Энхболд Төв аймагт ажиллаж байна. Тэрбээр аймгийн зүүн талын сумд, тухайлбал, Баян, Баяндэлгэр, Эрдэнэ зэрэг суманд  ажиллаж иргэд сонгогчидтойгоо уулзахын зэрэгцээ хөдөөгийнхний ажил амьдрал, хаваржилт, мал төллөлтийн байдалтай танилцаж явна.

-Олны анхааралд байсан өөр нэг асуудал гэвэл УИХ-ын 23 дугаар тогтоол Үндсэн хууль зөрчсөн эсэх тухай байв. Энэ асуудлаар Үндсэн хуулийн цэц хуралдав. Цэцийн дунд суудлын хуралдаанаар УИХ-ын 2017 оны 23 дугаар тогтоол "Үндсэн хуулийг зөрчөөгүй” гэж үзжээ. Үндсэн хуулийн Цэцийн 2 дугаар сарын 28-ны 03 тоот дүгнэлтэд "Эрдэнэт үйлдвэр” ХХК-ийн 49 хувийг төр өөртөө авах УИХ-ын 23 дугаар тогтоол нь ҮНДСЭН ХУУЛЬ ЗӨРЧӨӨГҮЙ гэж үзлээ.

-Долоо хоногийн эхээр Ерөнхий сайд У.Хүрэлсүхийн удаахь гадаад айлчлалын тов гарлаа.  Ерөнхий сайд хоёр дахь гадаад айлчлалаа ирэх дөрөвдүгээр сарын 10-13-нд БНХАУ-д хийх тов гараад байна.  

-Москва хотноо Монгол, Оросын Засгийн газар хоорондын комиссын 21 дүгээр хуралдаан хоёрдугаар сарын 26-28-ны өдрүүдэд болж өндөрлөлөө. Тус комиссын Монголын хэсгийн ахлагч шадар сайд Ө.Энхтүвшин хуралдаан амжилттай болсныг дурдаад одоо гагцхүү хийж хэрэгжүүлэх үлдлээ хэмээн мэдэгдсэн. Хуралдааны үеэр Монгол Улсад Цөмийн шинжлэх ухаан, технологийн төв байгуулахад хамтран ажиллах тухай санамж бичиг, Монгол Улсын Хөгжлийн банк, Олон улсын хөрөнгө оруулалтын банк хоорондын зээлийн хэлэлцээрийг тус тус байгуулав. Комиссын ээлжит хуралдааны хүрээнд талууд хоёр орны худалдаа, эдийн засаг, зам, тээвэр, санхүү, зээл тусламж, хүрээлэн буй орчин, түлш, эрчим хүч, аж үйлдвэр, хөдөө аж ахуй, хүмүүнлэгийн салбарын хамтын ажиллагааны асуудлыг хэлэлцжээ.

-Засгийн газрын хуралдаанаар Улаанбаатар хотын утааг бууруулах зорилтын хүрээнд ирэх 2019 оны 5 дугаар сарын 15-аас хойш нийслэлд түүхий нүүрс оруулахыг хориглосон шийдвэр гаргалаа. Түүхий нүүрсний хэрэглээг сайжруулсан түлшээр солиход утааг 50 хувиар багасгаж чадна гэсэн тооцоог албаныхан хэлж байгаа юм.

-Өнөөдөр нийгмийг бухимдуулж, иргэдийн анхаарлыг татаж байгаа асуудал гэвэл  "Эрдэнэт үйлдвэр” ХХК  баталгаа гаргаж, ӨАБНУ-ын  ''Стандарт'' банкнаас авсан зээл юм. Энэ асуудалтай холбогдуулан  УИХ-ын гишүүн Х.Нямбаатар, Т.Аюурсайхан, Л.Оюун-Эрдэнэ, Ж.Энхбаяр, Л.Энхболд нараас Монгол Улсын Ерөнхий сайд У.Хүрэлсүхэд тавьсан асуултын хариуг Засгийн газар хүргүүлээд байна. Хэрэв та энэхүү хариуг бүрэн эхээр нь уншихыг хүсвэл Засгийн газрын албан ёсны www.zasag.mn сайтад нийтэлэгдсэн байгаа. 

- Монгол Улсын Ерөнхийлөгчийн Тамгын газар, "Хөгжил ардчилал” ТББ болон Конрад-Аденауэр сан хамтран энэ долоо хоногийн эхээр "Баялгийн засаглал” хэлэлцүүлгийг  Иргэний танхимд зохион байгууллаа.  УИХ-ын намрын чуулган нээлтээ хийсэн өдөр /2017.10.02/ Ерөнхийлөгч Х.Баттулга "Монгол Улс байгалийн баялгаа ашиглахын хэрээр ард түмэн нь өрөнд орж байгааг засаж, залруулах ёстой. Байгалийнхаа баялгийн засаглалыг зөв болгохын төлөө хамтраад ажиллах ажиллах шаардлага байна” гэж хэлсэн аж. Иймээс эхний хэлэлцүүлгийг "Байгалийн засаглал” сэдвээр зохион байгуулж буй бөгөөд цаашид энэ арга хэмжээ үргэлжлэх аж.

-Энэ сарын 1-нд Эх орончдын өдөр буюу МАН байгуулагдсаны 97 жилийн ой тохиов. Энэ үеэр МАН-д 97 шинэ гишүүн элсүүлэх арга хэмжээ Тусгаар тогтнолын ордонд болов.

-Иргэдийн хамгийн их сонирхон хүлээдэг Эрдэнэс Тавантолгойн 1072 ширхэг хувьцаанд ирэх жилээс ногдол ашиг хуваарилах боломжтой  гэсэн мэдээлэл  дуулдлаа. Тус компани өнгөрсөн 2017 400 гаруй тэрбум төгрөгийн ашигтай ажилласнаас гадна  Чалко болон бусад өр төлбөрөө барагдуулжээ. Иймээс компанийг нээлттэй компани болгохоор зорьж байгаа ажээ.