УИХ-ын чуулганы нэгдсэн хуралдаан эхэллээ. Хэлэлцэх асуудалтай холбогдуулан Бичил уурхай эрхлэгч иргэдийн талаар авах арга хэмжээний тухай УИХ-ын тогтоолын төслийг хойшлуулах саналыг гишүүн А.Сүхбат гаргалаа.
Тэрбээр "Бичил уурхай эрхлэгч иргэдийн талаар авах арга хэмжээний тухай энэ асуудал өнгөрсөн хавар Байгал орчны байнгын хороогоор хэлэлцэгдэж байсан. Тухайн үеийн Уул уурхайн сайд бичил уурхайчдад тав таван га газар шийдээд өгчихье гэх зүйлийг ярьсан ч дэмжигдээгүй. Өнөөдөр дахиад ороод ирлээ. Нөхөн сэргээлтийн асуудлаа шийдэж байж дараагийн асуудалдаа орсон дээр байх. "Ядуурлын төвшин их байна. Иймээс ард түмнийг хүрзээ бариад уул уурхай руу ор” гэх л асуудлыг шийдэх гээд байна. Энэ асуудлыг хэлэлцэх шаардлагагүй гэж үзээд горимын санал хураалгамаар байна. Уул уурхайн сайд нь ч алга тиймээс энэ асуудлыг хойшлуулах хэрэгтэй” гэсэн юм.
Энэ асуудалтай холбогдуулан хэд хэдэн гишүүн байр сууриа илэрхийлсэн юм.
УИХ-ын гишүүн Т.Аюурсайхан: Тогтоолын төслөө уншаад үзэх юм бол бичил уурхай руу ард түмнийг хошууруулах гээд байгаа асуудал биш. Тэнд байгаа иргэдийн эдийн засгийн бус нийгмийн хамгаалахад чиглэсэн асуудлуудыг тусгасан байгаа.
УИХ-ын гишүүн Б.Бат-Эрдэнэ: Уул уурхайн асуудал улсын хэмжээнд маш их замбараагүй болж байна. Улсын эдийн засгийн хөгжилд тодорхой хувь нэмэр оруулж л байгаатай маргахгүй. Гэхдээ байгаль орчинд нөхөж баршгүй хохирол учруулаад байна. Уул уурхайн лицензийг эмх цэгцэд оруулахыг ард иргэд хүсэж байна. Шинэ Засгийн газрын амлалт ч ийм байгаа. Энэ асуудлыг нухацтай хэлэлцэх хэрэгтэй.
УИХ-ын гишүүн Д.Оюунхорол: Энэ асуудлыг түр хойшлуулах хэрэгтэй. Нэгдүгээрт, Уул уурхайн сайд алга. Хоёрдугаарт, байгаль эх дэлхийгээ хохирооход гар бие оролцож байгаа хүмүүс бол бичил уурхай эрхлэгчид. Одоо гар аргаар алт олборлолт хийж байгаа хүн гэж байхгүй. Ихэнх нь техникжсэн супер нинжа болсон. Үүнийг статус нь гар аргаар алт олборлож байгаа бичил уурхайчид гээд байгаа юм. Энэ бол цоорхой байгаа хуулийн зохицуулалт. Томоохон ААН-ууд нөхөн сэргээлтийг тодорхой хэмжээнд хийж байгаа. Нөхөн сэргээлт хийхгүй орхиод явж байгаа нь бичил уурхайчид юм билээ. Бичил уурхай эрхлэгчдийн хариуцлагын асуудлыг ярих хэрэгтэй.
Гишүүд байр сууриа илэрхийлсний дараа санал хураасан ч А.Сүхбат гишүүний горимын санал ч дэмжигдсэнгүй.
Санал хураалтын дараа Б.Энх-Амгалан гишүүн мөн уг асуудлыг хойшлуулах санал гаргалаа. Уг хуулийн төслийг хэлэлцэх нь зүйтэй ч хөдөлмөр хамгаалал, иргэдийн эрүүл мэнд, ус, ой хамгааллын олон асуудал бичил уурхайн эргэн тойронд яригдана гэдгийг хэлсэн юм. Тиймээс дахин Бичил уурхай эрхлэгч иргэдийн талаар авах арга хэмжээний тухай УИХ-ын тогтоолын төслийг өнөөдрийн хуралдааны хэлэлцэх асуудлаас хойшлуулах санал хураалт явуулахад гишүүдийн олонх дэмжлээ.
Одоо чуулганаар "Төсвийн тогтвортой байдлын зөвлөлийн дүрэм батлах тухай” Монгол Улсын Их Хурлын тогтоолын төслийг хэлэлцэж байна.
П.ГОО
Оллоо.мн
Оллоо.мн
